اسلام آباد۔10ستمبر (اے پی پی) پاکستان اتے بحرین ݙوہیں پاسے تعاون کوں مستحکم کرݨ کیتے جوائنٹ ورکنگ گروپ دے قیام ، انسداد منشیات، ایکسٹراڈیشن و میوچل لیگل اسسٹنٹس، پولیس ٹریننگ اتے سپیشل بٹالین ٹریننگ دے شعبے اچ مفاہمتی یادداشتاں تے دستخط کرݨ تے اتفاق کیتے۔ بحرین دے وزیر داخلہ لیفٹیننٹ جنرل راشد بن عبداللہ الخلیفہ دے وزارت داخلہ آوݨ تے وفاقی وزیر داخلہ محسن نقوی خیر مقدم کیتا۔ بحرین دے وزیر داخلہ لیفٹیننٹ جنرل راشد بن عبداللہ الخلیفہ پاکستانی ہم منصب محسن نقوی نال ملاقات کیتی۔ پاکستان اتے بحرین دے وزرائے داخلہ وچال وفداں دی سطح تے وی مذاکرات تھئے جئیں اچ پاک بحرین تعلقات، انسداد منشیات، انسداد دہشت گردی، کوسٹ گارڈز، بارڈر سیکیورٹی اتے پولیس دے شعبیں اچ تعاون ودھاوݨ تے تفصیلی ڳالھ مہاڑ کیتی ڳئی ۔ ݙوہیں ملکاں انسداد دہشت گردی، انسداد منشیات اتے امیگریشن دے شعبے اچ تعاون ودھاوݨ تے اتفاق کیتا۔ وزیر داخلہ محسن نقوی آکھیے جو انسداد منشیات دے شعبے اچ تعاون ٻہوں اہمیت دا حامل اے، اے اساݙیاں آندیاں نسلاں دے مستقبل دا معاملہ اے۔ پاکستان دی اینٹی نارکوٹکس فورس محدود وسیلیں دے باوجود قابل ستائش کم کریندی پئی اے۔ انہاں ݙسایا جو اینٹی نارکوٹکس فورس ولوں 146 ملین ڈالر دی تاریخ دی ساریں توں وݙی ریکوری کیتی ڳئی اے۔ ایں اجلاس انسدادِ منشیات دے شعبے اچ مشترکہ لائحہ عمل تیار کرݨ اچ مدد ݙیسی۔ انہاں بحرین ولوں آپݨے سفارت خانے اچ ڈرگ لائزن آفیسر دی تعیناتی کوں وی خوش آئند قرار ݙتا۔ انہاں آکھیے جو بحرین اچ رہݨ آلی ہک لکھ ویہہ ہزار توں ودھ پاکستانی کمیونٹی ݙوہیں ملکاں دی ترقی اچ اہم کردار ادا کریندی پئی اے۔ بحرین دے وزیر داخلہ آکھیے جو بحرین پاکستان نال برادرانہ تعلقات کوں ٻہوں اہمیت ݙیندا پئے، بحرین پاکستان دے نال سارے شعبیں اچ تعلقات کوں اڳوں ودھاوݨ چاہندے ۔ جوائنٹ ورکنگ گروپ دے قیام اتے مفاہمتی یادداشتاں تے دستخط نال ݙوہیں ملکاں وچال تعاون کوں ودھارا مِلسی۔ ایں موقع تے بحرین دے وفد دے ارکان، وزیر مملکت داخلہ طلال چوہدری، وفاقی سیکرٹری داخلہ، سپیشل سیکرٹری داخلہ، ایڈیشنل سیکرٹریز داخلہ، ڈی جی اے این ایف، کمانڈنٹ این پی اے، چیف کمشنر و آئی جی اسلام آباد وی موجود ہن۔
.jpg)
