اسلام آباد۔9اکتوبر(اے پی پی( وزیر دفاع خواجہ محمد آصف آکھیے جو ملک دے اندر یا ٻاہر دہشت گرداں دیاں پناہ گاہیں ہݨ برداشت کائنی، افغانستان وقتی ہک وفد بھیجݨ دی تجویز اے جو حکومت نال ڳالھ کرے جو اے سلسلہ ناقابل برداشت تھی چکیے، جیڑھا وی دہشت گرداں کوں پناہ ݙیسی ایں دے خلاف کارروائی تھیسی، اساکوں سیاسی اتے حکومت توں اُتے تھی تے ایں دہشت گردی دے خلاف مسلح افواج دے نال کھڑے تھیوݨا ہوسی، ہݨ برداشت دی حد مُک ڳئی اے، روزانہ اساݙے افسر تے جوان شہید تھیندے پئن۔ قومی اسمبلی اچ دہشت گردی دے خلاف جنگ اچ شریک مسلح افواج اتے عسکری اداریں نال یکجہتی دی تحریک تے ڳالھ کریندے انہاں آکھیا جو معمول دی کارروائی روک تے معاملہ زیر بحث گھن آوݨ چنڳاں اقدام اے جو پاک فوج اتے شہداء دے ورثاء نال اظہار یکجہتی اتے ایں لعنت نال کیویں نبݨوں، سیاست بعد اچ تھیندی رہسی۔انہاں آکھیا جو ترائے سال پہلے میں افغانستان ڳیا، افغان حکام کوں ݙسایا جو اُتھوں اساݙے ݙو صوبیں اچ دہشت گردی تھیندی پئی اے، اتھاں 6 یا 7 ہزار دہشت گرد ٻیٹھے ہوئے ہن اتے گزریل حکومت انہاں اچوں ترائے ہزار کوں سوات اچ گھن آتے آباد کیتا، اساں انہاں کوں آکھیا جو انہاں کوں کنٹرول کرو، انہاں دیاں پناہ گاہواں ختم کرو، انہاں دی سرپرستی ختم کرو۔ انہاں مطالبہ کیتا جو 10 ارب روپے ݙیوو اساں انہاں کوں ملک دے مغربی علاقیں اچ ݙوجھی جاہ سرحد توں پرے آباد کریسوں اتے تہاݙی سرحد دے نیڑے انہاں دیاں پناہ گاہواں ختم تھی ویسن، جیں تے اساں انہاں توں ایں دی گارنٹی منڳی جو ایں دی کیا گارنٹی اے جو او ول اساݙے ملک نہ آون پر او ضمانت نہ ݙیندے پئے ہن، ایں کیتے ڳالھ اڳوں نی ودھ سڳی۔ ایں تے ڳالھ ول ول تھیندی رہی، چار ملکاں روس، چین، ایران اتے پاکستان جیڑھے دہشت گردی توں سِدّھء متاثر ہن، انہاں دے اجلاس وی تھیندے رہیے پر کوئی چنڳی کامیابی حاصل نی تھئی۔ انہاں آکھیا جو گزریل ݙینھ ݙو افسراں سودھے 11 شہادتاں تھئن اڄ وی ایں طرح مزید شہادتاں تھئن۔ انہاں آپݨے نِکّے نِکّے ٻال سوگواراں اچ چھوڑئن، انہاں دے لواحقین دے جذبے جوان ہن۔ انہاں آکھیا جو ہک پاسے ایں طرح دا جذبہ ہووے اتے ݙوجھے پاسے اساں معمول دی زندگی گزریندے ہووں تاں اے ماݨ کرݨ یا کریڈٹ گھنݨ آلی کوئی ڳالھ کائںی۔انہاں آکھیا جو ویلھا آڳئے جو سارے وفاقی اتے سارے صوبائی حکومتاں ایں مسئلہ تے ہک زبان تھی تے پاک فوج دے نال کھڑے تھیوݨے چاہیدن۔ اے ہک مقدس فرض اے جو او سرحداں دی حفاظت کریندے پئن، ݙوجھا آپریشن بنیان مرصوص دے بعد اندرلے ملک اتے ٻاہرلے ملک اساݙیاں افواج جیڑھا آپݨا لوہا منوائے او اساں تے قرض بݨدے۔ ایں کوں ادا کرݨ دا طریقہ اے ہے جو اساں سیاسی اختلافات اتے فرق کوں ہک پاسے رکھ تے ایں معاملہ تے ہک مٹھ تھی تے کھڑوں۔ خواجہ آصف آکھیا جو ہندوستان کوں جیں طرح شکست ݙتی او اڄ وی زخم چٹیندا پئے۔ اے کریڈٹ افواج دا اے جیں پاروں دنیا پاکستان دی تعریف کریندی اے ۔ پاکستان کیتے اے اعزاز اے، ٻاہرلی دنیا دے لوک مبارخ ݙیندن۔ امریکہ، اسلامی ملکاں سودھے ہر جاہ پاکستان دی عزت و وقار اچ ودھارا تھئے ایں دی وجہ اے قربانیاں ہن اتے اے ہک سرمایہ کاری اے جو آپݨے خون نال فورسز کریندیاں پئن۔ انہاں قربانیاں ݙیوݨ آلے لوکاں دی قربانیاں دا اعتراف تھیوݨا چاہیدے۔ ایں ہک نکتے تے افواج دے نال یکجہتی تھیوݨی چاہیدی اے باقی مسئلے حل تھیندے رہسن۔ انہاں آکھیا جو پاکستان دی عزت، وجود، فوج دی عزت و وقار اولین اے۔ انہاں آکھیا جو کابل ہک وفد بھیڄݨ دی تجویز اے جو افغانستان دی حکومت نال ڳالھ کرے جو اے چیز ہݨ ناقابل برداشت تھی چُکی اے۔ افغانستان دے لکھاں مہاجرین کئی ݙہاکیں توں اتھاں ٻیٹھن، لوک اتھاں نسل در نسل ٻیٹھن ، پر انہاں دی پاکستان دے نال کوئی وفاداری کائنی ، اے ترائے نسلاں توں اتھاں ہن پر انہاں کوں آکھو تاں اے پاکستان زندہ باد دا نعرہ نی لیندے۔ انہاں اچ ٻہوں گھٹ کوں اقوام متحدہ دے ادارہ افغان مہاجرین توں پیسے مِلئن، باقی اے اتھاں کاروبار کریندن، اے اتھاں ارب پتی بݨ چُکن پر جیں تھالی اچ کھاندن اوں اچ چھید کریندن، جیں مٹی توں انہاں کوں فیدہ مِلدا پئے، اوں ملک دے نال دشمنی کریندن، اے ہݨ ناقابل برداشت اے۔ اساکوں ہک مٹھی تھی تے من حیث القوم ایں دا جواب ݙیوݨا پوسی جو اساݙی یا افغانستان دی سرزمین تے انہاں کوں پناہ ݙیندن، جے کہیں پناہ گاہ توں کوئی ݙاہ پندرہ دہشت گرد نِکل تے فورسز دے قافلے تے حملے آور تھیندن تاں ایں دے جواب اچ تھی سڳدے اُتھاں کارروائی نال اجتماعی جانی نقصان وی تھیوے انہاں کوں اوں کوں بھوڳݨا پوسی، جتھاں انہاں دیاں پناہ گاہواں ہوسن انہاں کوں وی بھوڳݨا پوسی، جیڑھے پناہ ݙیندن انہاں کوں وی بھوڳݨا ہوسی۔ ٻہوں تھی ڳیا ہݨ اساݙیاں افواج اتے حکومت دے صبر دا پیمانہ بھر چُکیے۔ انہاں آکھیا جو اساں افواج دے نال کھڑوں اتے اساں انہاں دے مقروض ہیسے جو ایں ملک دی حفاظت اتے عالمی سطح تے اساݙے وقار اچ ودھارا کرتے انہاں اساں تے احسان کیتے، افواج اساݙی عزت اتے وقار اچ ودھارا کیتے۔ اتھاں لوک انہاں دی مذمت کرݨ تے تیار کائنی۔ انہاں دے خلاف کُھل تے ڳالھ نی کریندے اے قبول کرݨ دے قابل کائنی۔ انہاں آکھیا جو اتھاں کوئی ݙوجھا رستہ کائنی، یا انہاں دے خلاف یا انہاں دے نال کھڑے تھیوو، کوئی ݙوجھا رستہ کائںی۔ دہشت گرداں کیتے کوئی برداشت کائںی۔ اِیہو پیغام افغانستان کیتے اے۔ ایں تے کہیں سیاست دے متحمل نی تھی سڳدے۔ انہاں آکھیا جو فورسز دہشت گردی دے خلاف جنگ اچ مصروف عمل اے اتے اساں اتھاں آپݨا اقتدار بچاوݨ دے چکر اچ ہیسے۔ اے انہاں قربانیاں اتے دنیا اچ کئی ݙہاکیں دے بعد جنگ اچ اساݙیاں فورسز دی وجہ توں عزت و آبرو بحال تھئی اے، دنیا اساݙی افواج دا لوہا منیندی پئی اے، اساݙی عزت و توقیر کریندی پئی اے ایں دے باوجود اختیارات رکھݨ آلے لوکاں کوں کُھل تے پاکستان، پاکستان دی افواج، شہیداں دے نال کھڑے تھیوݨا چاہیدے، ایں تے سیاست نی تھیوݨی چاہیدی۔
