لاہور۔4 اکتوبر (اے پی پی) وزیراعظم محمد شہباز شریف “حماس” دے بیان کوں جنگ بندی کیتے امید دی کرن قرار ݙیندے آکھیے جو پاکستان فلسطین وچ مستقل امن کیتے دوست تے بھرا ملکاں دے نال رل تے کم کریندا رہسی۔ “ایکس” تے اپݨے پیغام وچ وزیراعظم محمد شہباز شریف آکھیا جو جݙاں توں فلسطینی عوام دی نسل کشی شروع کیتی ڳئی اے اڄ الحمدللہ اساں جنگ بندی دے ساریں توں زیادہ نیڑے ہیسے۔ انہاں آکھیا جو پاکستان ہمیشہ توں فلسطینی عوام دے نال کھڑا ریہے تے ہمیشہ انہاں دا ساتھ ݙیندا رہسی۔ وزیراعظم قطر، سعودی عرب، متحدہ عرب امارات، ترکیہ، اردن، مصر تے انڈونیشیا دی قیادت دا شکریہ ادا کیتا جنہاں مسئلہ فلسطین دے حل کیتے اقوام متحدہ دی جنرل اسمبلی دے 80ویں اجلاس دے موقع تے صدر ٹرمپ نال ملاقات کیتی۔ انہاں صدر ٹرمپ دا وی شکریہ ادا کیتا۔ وزیراعظم آکھیے جو حماس دی طرفوں جاری بیان جنگ بندی کیتے امید دی کرن تے امن کوں یقینی بݨاوݨ کیتے ہک رستہ ݙیندے جیڑھا اساں ولدا بند تھیوݨ دی اجازت کائنی ݙیوݨی۔ انہاں آکھیا جو انشاء اللہ پاکستان فلسطین وچ مستقل امن کیتے اپݨے سارے دوست تے بھرا ملکاں نال رل تے کم کریندا رہسی۔
.jpg)
.jpg)
