اسلام آباد۔8دسمبر(اے پی پی):ارشد شریف قتل ازخود نوٹس اچ حکومت سپریم کورٹ اچ سپیشل جے آئی ٹی دی تشکیل دے بعد نوٹیفکیشن جمع کراݙتا۔ عدالت عظمیٰ جے آئی ٹی توں ہر ݙو ہفتے بعد پیشرفت رپورٹ منگدے ہوئیں قرار ݙتے جو جے آئی ٹی عبوری پیشرفت رپورٹس ججز کوں جائزے کیتے چیمبرز اچ پیش کریسی، رپورٹس تے کھلی عدالت اچ سماعت تھیسی ۔ سپریم کورٹ اچ صحافی ارشد شریف قتل ازخود نوٹس کیس دی سماعت چیف جسٹس پاکستان عمر عطا بندیال دی سربراہی اچ پنج رکنی لارجر بنچ کیتی۔ دوران سماعت ایڈیشنل اٹارنی جنرل عامر رحمان پنج ارکان تے مشتمل نویں جے آئی ٹی دا نوٹیفکیشن عدالت اچ پیش کیتا۔ جے آئی ٹی اچ آئی بی توں ساجد کیانی، ایف آئی اے توں وقار الدین سید، ڈی آئی جی ہیڈ کوارٹر اویس، ایم آئی توں مرتضی افضال، آئی ایس آئی توں محمد اسلم شامل ہن۔ چیف جسٹس ایں موقع تے ریمارکس ݙتے جو جے آئی ٹی کوں وزارت خارجہ رستہ وی ݙکھائے تے چنڳیاں تجاویز وی ݙتن ۔ ایڈیشنل اٹارنی جنرل آکھیے لوڑھ پئی تاں ملزمان دی گرفتاری کیتے انٹرپول نال وی رابطہ کیتا ویسی ۔ چیف جسٹس آکھیے جے آئی ٹی کوں کوئی رکاوٹ آوے تاں عدالت ںال رجوع کرسڳدی اے جݙاں جو جے آئی ٹی کوں فنڈز سودھے کہیں وی چیز دی لوڑھ پئی تاں حکومت کوں آکھسوں۔ جسٹس مظاہر نقوی ھک موقع تے پچھیا جو کیا جے آئی ٹی مقدمہ اچ نامزد ملزمان کوں سݙیے ؟ جیں تے ایڈیشنل اٹارنی جنرل ݙسایا جے آئی ٹی دا پہلا کم ملزمان دی طلبی ہی ہوسی۔ جسٹس محمد علی مظہر پچھیا جو جے آئی ٹی کتنے عرصے اچ تفتیش مکمل کریسی ؟ جیں تے ایڈیشنل اٹارنی جنرل آکھیے جو تفتیش دا انحصار کینیا پولیس دے تعاون تے ہوسی ۔ تفتیشی ٹیم اپݨی طرفوں ہر ممکن کوشش کریسی جو وختی کم مکمل تھیوے ۔ جسٹس مظاہر نقوی آکھیے جے ملزمان پیش نہ تھیون تاں قانونی طریقہ اختیار کیتا ونڄ سڳدے ۔عدالت آکھیے ایس ایس پی اسلام آباد تے انہاں دی ٹیم جے آئی ٹی دی معاونت کریسن ۔ وزارت خارجہ قانونی معاونت اتے ملزمان دی حوالگی دی تجاویز ݙتن ۔ وزارت خارجہ موجب جے آئی ٹی نال ہر ممکن تعاون کیتا ویسی ۔ بعد اچ عدالت عظمی ارشد شریف ازخود نوٹس کیس دی مزید سماعت جنوری دے پہلے ہفتے تئیں ملتوی کرݙتی اے ۔
